Шахистите од највисока светска класа, оние со рејтинг поголем од 2700 поени, не му можат ништо на Марјан Митков. Интернационалниот мајстор од Скопје игра во голема форма на Европскиот Куп на Клубови кој оваа година се одржува во Пловдив, Бугарија.

Митков е непоразен после пет одиграни партии, а ремизираше со големите ѕвезди Мамеѓаров и Камски, кои лани ги бранеа боите на Алкалоид. Во моментов има неверојатен рејтинг перформанс од 2722 поени. Покрај двете реми кои ги спомнавме, ремизираше и со силниот српски велемајстор Драган Шолак (2577), а забележа победи против интернационалните мајстори Ван дер Верф и Лемерс, и двајцата од Холандија.

„Гамбит Асеко Сее“ има 2 победи и 3 порази и денес ќе се обиде да се врати на 50% скор со победа против англискиот „Бетсон“.