Александар Чоловиќ е победник на вчерашниот четврти и последен за 2010 брзопотезен турнир на Алкалоид, додека Дејан Стојановски е вкупен победник на четирите брзопотезни турнири кои Алкалоид ги организираше оваа година. Ова е епилогот после вчерашниот силен и масовен турнир на кој учествуваа 48 шахисти од државава.

Чоловиќ стигна до триумфот со 9 поени од 11 партии, а поен зад него заостана Стојановски на кој второто место на турнирот му беше доволно за севкупен триумф. Награди освоија уште и Органџиев, Станојоски, Панчевски и Менкиноски.

Пригодни награди од организаторот Алкалоид добија и најдобриот јуниор Кренар Таири, најдобрата дама Моника Стојковска и најдобриот ветеран Илија Стошевски.

Турнирот го затвори Никола Димовски кој најави дека Алкалоид и следната година ќе организира серија на турнири по забрзано темпо. Судии на турнирот беа Вахид Исмаили и Сашко Лакински а уште еднаш библиотеката „Страшо Пинџур“ во зградата на ЗОИЛ се покажа како одличен домаќин.

Целосната табела можете да ја преземете овде.