Заврши екипниот куп на ШФМ а пехарот му припадна на првиот фаворит, екипата „Алкалоид - тренери“. Второто место го освоија шахистите на Гамбит Асеко-Сее, а третото и припадна на екипата Бизнис Милениум.

Ова е епилогот на Купот на ШФМ за 2011 година кој ќе биде запаметен по неколку работи. Најпрво, ова беше најмасовнииот Куп во изминативе години. Учество зедоа 17 екипи, односно 80 шахисти кои придонесоа за вистинска шаховска атмосфера во хотелот Континентал во Скопје.

Понатаму, за прв пат после подолго време на Купот на ШФМ зеде учество една женска екипа, која си ги одмери силите на машкиот турнир. Дамите се пласираа на 10-то место, откако во неделата не успеаја да ги повторат одличните игри од првите четири кола.

Но она што најмногу радува е учеството на три јуниорски екипи, од кои резултатски се издвои најискусната екипа: јуниорите на Алкалоид забележаа 3 победи, 2 нерешени и само 2 порази, собраа 8 бода и се пласираа на 8-то место. За одбележување е и резултатот на 10-годишниот Тони Лазов кој освои 4 поени од 6 партии. Можеме да бидеме задоволни што повеќегодишната работа во шаховските школи почнува да дава резултати.

Конечната табела, како и други статистички податоци за екипите и играчите кои настапија, можете да погледнете овде.

Повеќе фотографии од настанот можете да погледнете овде.