Денес е спуштена завесата на 19-тиот ОПЕН Скопје, а српскиот велемајстор Роберт Маркуш и во второто гостување во Македонија си заминува со победнички пехар. Тој освои 6.5 поени од 9 партии и го подели првото место со Георгиев, Тодоровиќ, Станојоски и Панчевски. Маркуш е прв по дополнителните критериуми и покрај пехарот си заминува со парична награда од 1260 евра (првата награда изнесува 1500 евра но наградите се делат при делба на место).

Победи и покрај лошиот старт - ВМ Роберт Маркуш (десно)

Тројца наши репрезентативци се пласираа во првите пет што сигурно ќе придонесе за позитивна атмосфера во нашиот состав пред утрешното заминување на Европското првенство во Порто Карас, Грција. Но, да се вратиме на наградените: награди не освојуваа само најдобрите 10 на табелата. Специјални награди освоија:

- во женска конкуренција младите Моника Стојковска со 5 поени и Маја Милановиќ со 4.
- најдобар ветеран е Љубомир Хаџиманев
- најдобар млад шахист е Александар Константинов
- најдобар играч со рејтинг помал од 2000 поени е Агим Шемшиу
- најдобар играч со рејтинг од 2000 до 2199 поени е Срѓан Христовски
- најдобар играч со рејтинг од 2200 до 2299 е Никола Васовски

Уметникот Живко Поповски - Цветин подари свои слики на победникот Роберт Маркуш, потоа на Моника Стојковска и на најмладиот учесник Тони Лазов.

Турнирот го затвори претседателката на ШФМ, Лидија Софревска-Андонова која изрази благодарност до генералниот спонзор Алкалоид АД.-Скопје и до Агенцијата за Млади и Спорт, при што упати порака до учесниците, следната година да се видиме повторно на јубилениот 20-ти ОПЕН Скопје 2012.

ОПЕН Скопје помина во убава и борбена атмосфера а хотелот Континентал овозможи одлични услови за игра.

Конечна табела.